Nagsagawa ng Serbisyo Caravan ang Cagayan Police Provincial Office sa ilalim ng liderato ni PCol Renell Sabaldica, kasama ang iba’t ibang ahensya ng pamahalaan sa Santa Teresita, Cagayan.
Umabot sa 324 pamilya at indibidwal ang natulungan sa nasabing aktibidad.
Inanyayahang dumalo sa Caravan ang mga residente mula sa Barangay Dungeg, Aridowen, Villa, Centro West, at Masi ng naturang munisipalidad.
Nakatanggap ang mga residente ng relief packs, bigas, 10 litro ng tubig, bitamina, gamot, kulambo, kumot, banig, tsinelas, face shield, face mask, at alcohol.
Maliban dito, namahagi rin ng binhi at tulong-pinansyal na nagkakahalaga ng Php3,000 sa mga kwalipikadong benepisyaryo.
Kasabay ng Caravan, namahagi ng kaalaman at karanasan si Hon. Mauricio Aguinaldo, Kapitan ng Barangay Balanni sa Sto. Niño, Cagayan at Binibining Ivy Corpin alyas “Ka Elis” patungkol sa mapanlinlang na pagre-recruit at maling ideolohiya ng teroristang grupo.
Gayundin, sinunog ng mga kalahok ang watawat at mga libro ng CPP-NPA-NDF bilang pagkondena sa mahigit 50-taon nang pagpapahirap ng komunistang grupo sa mga mahihirap at pagsira sa kinabukasan ng mga kabataan. Nanumpa rin ang mga residente ng kanilang pagsuporta at pakikipagtulungan sa pamahalaan upang tuluyang tuldukan ang insurhensya at terorismo sa lalawigan.
Samantala, ipinaalam din sa mga residente ang mga programa ng PNP Cagayan kabilang ang PNP Pabahay Project, Libreng Kasal, BARANGAYanihan, at ang E-Sumbong – bagong sistema ng pagpapaabot ng reklamo at sumbong sa mga awtoridad.
#####
Article by Police Corporal Josephine T Blanche
