Leyte – Nagpadala ng karagdagang pwersa ang Police Regional Office 8 upang tugisin ang mga armadong grupo na responsable sa ambush noong nakaraang linggo sa Brgy. Victory, Calbayog City sa pamamagitan ng isang send-off ceremony na isinagawa sa PRO 8 Grandstand, Camp Sec. Ruperto K. Kangleon, Palo, Leyte, nitong Abril 19, 2023.
Ito ay pinangunahan ni Police Brigadier General Rommel Francisco Marbil, Regional Director kasama sina Police Colonel Owen Andarino, Deputy Regional Director for Administration; Police Colonel Salvador Alacyang, Deputy Regional Director for Operations; Police Colonel Romeo Desiderio, Chief, Regional Operations Division; Police Lieutenant Colonel Edwin Barbosa, Chief, Provincial Operations Unit ng Samar PPO; at Police Major Rhey Dollesin, Regional Pastoral Officer, PRO 8.
Ayon kay PBGen Marbil, ito ngayon ang nakikitang solusyon upang tugisin ang grupo na tinuturong responsable sa pamamaril na ikinasawi ng nasa tatlong katao at isang sugatan sa naturang lugar.
May kabuuang 72 PNP personnel ang pinadala, ang 23 dito ay nagmula sa Leyte Police Provincial Office, 16 ay mula sa Ormoc City Police Station, 9 mula sa Biliran Police Provincial Office.
Samantala, ang 24 pa na iba ay mula sa 804th Maneuver Company ng Regional Mobile Force Batallion 8 1st at 2nd Samar Police Maneuver Force Company.
Layunin ng Police Regional Office 8 na mas lalong paigtingin ang pagpapatupad ng Law Enforcement Operations at Public Safety sa Calbayog City, Samar.
