Upang mapanatili ang integridad at kapayapaan sa nalalapit na halalan, nagsagawa ang Olongapo City Police Office ng isang seminar hinggil sa mga batas at espesyal na operasyong may kaugnayan sa eleksyon sa SMX Convention Center, SM City Olongapo Central, Olongapo City nito lamang Disyembre 3, 2024.
Pinangunahan ito ng City Director na si Police Colonel Charlie D. Umayam, kasama ang panauhing tagapagsalita na si Ms. Ma. Luisa C. Lumanlan, City Election Officer ng Olongapo City.
Layunin ng seminar na bigyang-kaalaman at sanayin ang mga tauhan ng Olongapo City PNP sa mga mahahalagang probisyon ng batas at mga espesyal na pamamaraan para sa epektibo at ligtas na pagsasagawa ng halalan.
Tinalakay dito ang mga pangunahing aspeto ng batas hinggil sa eleksyon at mga operasyong pangkaligtasan upang masiguro ang maayos na daloy ng proseso ng pagboto.
Ang pakikipagtulungan ng PNP sa Commission on Elections (COMELEC) ay nagpapakita ng halaga ng inter-agency cooperation para sa maayos, mapayapa, at kapani-paniwalang eleksyon.
Ang seminar ay nagsilbing plataporma para sa pagpapalitan ng impormasyon, talakayan ng mga estratehiya, at koordinasyon upang tugunan ang mga posibleng hamon sa panahon ng halalan.
Patuloy ang PNP sa dedikasyon sa pagpapanatili ng patas at ligtas na proseso ng halalan. Ang aktibidad na ito ay isang hakbang tungo sa pagtiyak na ang bawat Pilipino ay makakaboto nang maayos, ligtas, at walang pangamba.
Panulat ni Pat Jilly Peña
