Bilang bahagi ng paghahanda para sa nalalapit na Pambansa at Lokal na Halalan sa Mayo 12, 2025, nagtalaga ang Lanao del Norte Provincial Police Office ng mga tauhan sa iba’t ibang voting centers sa buong lalawigan upang tiyakin ang seguridad sa isinagawang sabayang Final Testing and Sealing (FTS) ng mga Automated Counting Machines (ACMs) noong Mayo 6, 2025.
Layunin ng hakbang na ito na mapanatili ang kaayusan at katiyakan sa proseso ng halalan, alinsunod sa election security plan ng Philippine National Police (PNP).
Bahagi ng tungkulin ng mga pulis ang pagbibigay-proteksyon sa mga kagamitan sa halalan, pakikipagtulungan sa Commission on Elections (COMELEC), at pagpapanatili ng katahimikan sa panahon ng FTS.
Ayon kay Police Colonel Roy A. Magsalay, Provincial Director ng Lanao del Norte Police Provincial Office, nakatuon ang kanilang hanay sa pagbibigay ng patas at di-kinikilingang serbisyo upang masiguro ang maayos at ligtas na halalan.
“Pangunahing layunin namin ang pangalagaan ang integridad ng halalan sa pamamagitan ng pagbibigay ng seguridad sa bawat hakbang ng proseso, lalo na sa mahalagang yugto ng Final Testing and Sealing ng mga makina,” pahayag ni PCol Magsalay.
Panulat ni Pat Rizza C Sajonia
