Cotabato – Arestado ang isang Security Guard matapos makuhanan ng hindi lisensyadong baril at bala sa checkpoint operation ng Pikit PNP at AFP sa Sitio Baklayan, Brgy. Bulod, Pikit, Cotabato nito lamang Pebrero 28, 2023.
Kinilala ni Police Lieutenant Colonel John Miridel Calinga, Hepe ng Pikit Municipal Police Station, ang suspek na si alyas “Omar”, 48, may asawa, Security Guard, at residente ng Brgy. Barungis, Pikit, Cotabato.
Ayon kay PLtCol Calinga, dakong alas-2:00 ng hapon nang magsagawa ng checkpoint ang mga tauhan ng Pikit PNP at 9th Infantry Battalion Ng Philippine Army.
Narekober kay alyas “Omar’ ang isang caliber .45 pistol na may serial number na 817762, magazine at limang bala.
Nabigo ang suspek na magpakita ng mga kaukulang dokumento sa dala nitong baril kaya agad itong inaresto ng mga awtoridad.
Kasong paglabag sa RA 10591 o Illegal Possession of Firearms and Ammunition ang isinampa laban sa naturang suspek.
Giit naman ni PLtCol Calinga na patuloy ang kanilang himpilan sa pagpapanatili ng katahimikan sa kanilang nasasakupan alinsunod sa programa ni CPNP’s Peace and Security Framework na MKK=K (Malasakit, Kaayusan, Kapayapaan tungo sa Kaunlaran).
Panulat ni Patrolman Khnerwin Jay Medelin/RPCADU10
