Matagumpay ang paghahanda ng mga kapulisan ng Rizal sa pagresponde sa mga nasalanta ng bagyong Enteng sa iba’t ibang bayan ng Rizal nito lamang ika-02 ng Setyembre 2024.
Maaga pa lamang ng parehong araw nakaantabay na ang Reactionary Standby Support Force (RSSF) ng Rizal Police Provincial Office sa ilalim ng pamumuno ng masigasig na si Police Colonel Felipe B Maraggun na matatalaga sa mga munisipalidad na kinakailangan ng karagdagang pwersa upang masiguro ang bawat kaligtasan ng mamamayan.
Kasabay nito ang Cainta Municipal Police Station dakong 9:00 ng umaga ay tinulungan nilang lumikas ang mga residente ng Cainta na labis na naapektuhan ng pagbaha dulot ng bagyo.
Patuloy naman ang Search and Rescue Operation ng Antipolo PNP sa kahabaan ng Daang Pari, Sitio Hinapao, Barangay San Jose, Antipolo City, Rizal katuwang ang mga tauhan ng Bureau of Fire Protection at Barangay San Jose.
Ang search and rescue operation ng Rizal PNP ay nagiging unang tugon sa panahon ng sakuna, aksidente, o kalamidad. Ang kanilang kakayahan at kahandaan sa ganitong mga sitwasyon ay kritikal sa pagliligtas ng buhay at ari-arian.
Sa pamamagitan ng mabilis at organisadong pagkilos, natutulungan nila ang mga biktima na makaligtas mula sa panganib, tulad ng pagbaha, lindol, landslide, at iba pang sakuna. Ang kanilang presensya ay nagdudulot ng seguridad at tiwala sa komunidad, na alam nilang may aasahang tulong sa oras ng pangangailangan.
Bukod pa rito, nagiging daan din ito upang maiwasan ang paglala ng sitwasyon at mapabilis ang pagbangon ng komunidad mula sa trahedya.
