Santo Tomas, Davao del Norte – Isinailalim sa State of Calamity ang Munisipalidad ng Santo Tomas, Davao del Norte dahil sa malaking pinsala na dulot ng pagbaha sa sunod-sunod na malakas na ulan noong Abril 2, 2022.
Maraming lugar sa nasabing munisipalidad ang lubhang naapektuhan kabilang na ang 11 barangay dahil sa walang humpay na pag-ulan kung saan napinsala ang mga lupain, agrikultura at mga alagang hayop na umaabot ng Php15,947,803.50 gayundin ang mga imprastraktura at kalsada na umabot naman ng mahigit Php3,065,820 ang halaga.
Tinatayang Php25,946,705 ang kabuuang halaga ang kinakailangan para sa rehabilitasyon sa nasabing lugar.
Dahil dito ay posible nang gamitin ng mga lokal na pamahalaan ang kanilang Quick Response funds para sa disaster relief at rehabilitation efforts.
Ayon kay Municipal Information Officer, Mart Sambalud, batay sa rekomendasyon ng Municipal Risk Reduction Council ay naghain ng resolusyon ang Sangguniang Bayan ng Santo Tomas na nagdedeklara ng State of Calamity sa buong munisipyo sa ilalim ng Republic Act No. 10121 o ang Philippine Disaster Risk Reduction and Management Council.
Nagpapasalamat naman ang pamahalaan ng Santo Tomas dahil napakahalaga ng nasabing deklarasyon upang sila ay magkaroon ng kakayahan na magamit ang nasabing calamity funds habang ipinatupad naman ang price freeze sa mga pangunahing bilihin para sa kapakanan ng mga mamamayan ng Munisipalidad.
###
Panulat ni Patrolman Preal Cris Edosma
