Iginawad ang retirement honor ng Police Regional Office 10 para kay Police Brigadier General Ricardo G Layug Jr., Outgoing Regional Director na ginanap sa Camp 1Lt Vicente G Alagar, Lapasan, Cagayan de Oro City nito lamang ika-26 ng Setyembre 2024.
Si PBGen Layug Jr., ay kasapi ng Philippine National Police Academy (PNPA) Tagapaglunsad Class of 1993 at nagsilbi bilang Director ng Philippine National Police (PNP) Engineering Service at former Chief of PNP Aviation Security Unit, National Capital Region.
Nabatid na nagsilbi bilang Regional Director ng Police Regional Office 10 ang butihing heneral sa loob ng isang taon.
Kilala din si PBGen Layug Jr., na isang premyadong pulis na nagkamit ng iba’t ibang parangal at nagbigay ng karangalan sa organisasyon dahil sa taglay nitong dedikasyon sa trabaho bilang isang alagad ng batas at mamamayan.
Sa kanyang mahaba at makulay na paninilbihan sa bayan, ito ay kilala bilang isang probinsyanong may puso sa pagseserbisyo lalo na sa kanyang mantra na: “Serbisyong CARDO, Serbisyong may Puso”.
Samantala, nanawagan si RD Layug Jr., na patuloy na suportahan at ipagpatuloy ang magandang reputasyon at dedikasyon sa trabaho ng Higalang Pulis sa pamumuno ng bagong Regional Director ng Northern Mindanao na si PBGen Jaysen C De Guzman.
