Baggao, Cagayan – Arestado ng Cagayan PNP ang tinuturing na Top 3 Most Wanted Person sa Rehiyon Dos sa Barangay Alba, Baggao, Cagayan noong ika-13 ng Hulyo taong kasalukuyan.
Kinilala ni Police Colonel Renell R Sabaldica, Provincial Director ng Cagayan Police Provincial Office, ang suspek na si Fernando Victorio, 39, tubong Barangay Sta. Barbara, Iguig, Cagayan ngunit kasalukuyang naninirahan sa Barangay Centro 3, Lasam, Cagayan.
Ayon kay PCol Sabaldica, nahuli ang suspek sa ikinasang operasyon ng mga tauhan ng Gattaran Police Station, 2nd Mobile Force Platoon ng 1st at 2nd Cagayan Provincial Mobile Force Company, Regional Intelligence Unit 2 at Regional Group for Special Concern.
Ayon pa kay PCol Sabaldica, ang suspek ay naaresto sa bisa ng Warrant of Arrest para sa kasong Murder at walang inirekomendang piyansa.
Samantala, patuloy pa rin ang paghahanap ng mga otoridad kay Melbert Macabangon, sa isa pang kasamahan nila Victorio na pumaslang sa isang magsasaka at ibinaon sa bayan ng Gattaran, Cagayan.
Pinuri naman ni Police Brigadier General Steve B Ludan, Regional Director, Police Regional Office 2 ang mga tauhan ng Cagayan PPO dahil sa pagsusumikap at pagpupursige upang mahuli at mapanagot sa batas ang mga lumabag nito.
Source: Cagayan PPO/ RPIO 2
###
Panulat ni Police Corporal Carla Mae P Canapi
