Iloilo City – Naaresto ang isa sa dalawang drug suspek sa ikinasang drug buy-bust operation ng Regional Police Drug Enforcement Unit 6 (RPDEU-6) at Iloilo City Police Station 1 sa Brgy. Rizal, Pala-Pala 1, Iloilo City, bandang 12:10 ng hapon, nito lamang ika-18 ng Hulyo 2023.
Kinilala ni Police Captain Peter John Ramos, Officer-In-Charge ng Iloilo City PS1, ang mag-amang suspek na sina Michael John Hilario alyas “Tol”, 29, walang trabaho (Main Target) at si Virgilio Hilario alias “Jun-Jun”, 47, parehong residente ng Brgy. Rizal, Pala-Pala 1, Iloilo City.
Ayon kay PCpt Ramos, narekober sa nasabing operasyon ang 11 pakete ng pinaghihinalaang shabu na may bigat na 55 gramo at may Standard Drug Prize na Php374,000.
Ayon pa kay PCpt Ramos, sa kasagsagan ng naturang operasyon ay nagawang makatakas ang ama ng nahuling suspek na si Virgilio Hilario matapos itong dumaan sa pinto sa likod ng kanilang bahay papuntang squatter area.
Sa ngayon ay nakakulong na ang nahuling main target sa tanggapan ng Iloilo City Police Station 1, habang patuloy pa rin ang paghahanap at pakikipag-ugnayan sa mga nakakaalam sa kinaroroonan ng nakatakas na suspek.
