Arestado ng Taytay Municipal Police Station ang isang Regional Most Wanted Person na may kasong Murder sa Barangay Dolores, Taytay, Rizal nito lamang ika-11 ng Pebrero 2025.
Kinilala ni Police Colonel Felipe B Maraggun, Provincial Director ng Rizal Police Provincial Office, ang suspek na si alyas “Ed”, 47 taong gulang, isang security guard at residente ng Barangay San Isidro, Taytay, Rizal.
Ayon sa mga awtoridad, nabisto ang nasabing suspek habang pinoproseso ang aplikasyon nito para sa National Police Clearance matapos lumabas na mayroon itong pending Warrant of Arrest sa kasong Murder na walang inirerekomendang piyansa.
Dahil dito, agad namang inimpormahan ng tauhan na nakatalaga sa police clearance noong araw na iyon ang warrant team ng nasabing istasyon upang ihain ang Warrant of Arrest sa suspek at nagresulta sa matagumpay na pagkakaaresto nito.
Patunay lamang na ang Pambansang Pulisya ay patuloy sa pagpapatupad ng sinumpaang tungkulin kontra kriminalidad na naaayon sa agenda ng gobyerno na itaguyod ang kaayusan at kaligtasan ng publiko, kapayapaan at seguridad na magkaroon ng maunlad na isang Bagong Pilipinas.
Source: Rizal PPO
Panulat ni Patrolwoman Pricelle May T Urbano
