Masbate City – Arestado ang isang miyembro ng CTG na isa sa salarin sa pagkamatay ng magpinsan na Absalon sa kasong 2 counts of Murder sa Masbate City sa manhunt operation ng Masbate PNP nito lamang Lunes, Abril 18, 2022.
Kinilala ni Police Colonel Rolly Albaña, Provincial Director ng Masbate Police Provincial Office ang suspek na si Rolly Hermina y Banoy, 51, residente ng Barangay Bolo, Masbate City.
Si Hermina ay miyembro ng Larangan 1, Komite ng Probinsya 4 sa ilalim ng command ni Eddie Rosero alyas ka “Star” na nakatuon sa operasyon sa ikalawang distrito ng Masbate.
Ayon kay Police Colonel Albaña, dakong 1:00 ng hapon naaresto ang suspek sa Masbate City ng pinagsamang mga operatiba ng Masbate PNP at Philippine Army.
Ayon pa kay Police Colonel Albaña, si Hermina ay naaresto sa bisa ng Warrant of Arrest na may kasong 2 counts Murder na walang piyansa, dalawang nakabinbin na kasong Crimes Against Humanitarian Law, Genocide and other Crimes Against Humanity at siya rin ay kabilang sa pagpatay sa isang sibilyan na si Samuel Verano noong taong 2019.
Pinuri ni Police Brigadier General Jonnel Estomo, Regional Director, PRO5 ang mga operatiba na nanguna sa nasabing operasyon upang tugisin at dakpin ang akusado.
“Ang ating mga kapulisan katuwang ang iba pang ahensya ng gobyerno ay hindi tumitigil upang makamit ang hustisya sa mga biktima. Ito rin ay sa paglalayong iwasan at protektahan ang bawat Bicolano mula sa karahasan at panggigipit na maaaring gawin ng mga rebeldeng grupo”, ani PBGen Estomo.
Source: KASUROG Bicol
###
Panulat ni Patrolman Rodel Grecia
