Tacloban City – Mahigit sa isang milyong halaga ng ilegal na droga ang nasamsam sa Rank 1 Regional Priority Target sa isinagawang buy-bust operation ng mga operatiba sa Bypass Road Brgy. 95 Caibaan, Tacloban City, Sabado ng madaling araw, Enero 6, 2024.
Kinilala ang suspek na si alyas “Macmac”, 38, residente ng Villa Sophia, Barangay 108, Tagpuro, Tacloban City at tinaguriang Rank 1 Regional Priority Target ng rehiyon.
Ang operasyong isinagawa ng Regional Drug Enforcement Unit (RDEU-8) sa pangunguna ni Police Major J-Rale Ocso Paalisbo, Provincial Intelligence Team – Leyte, sa pakikipag-ugnayan ng Police Station 1 – Tacloban City Police Office at Philippine Drug Enforcement Agency 8.
Narekober sa operasyon ang humigit-kumulang 200 gramo ng hinihinalang shabu na nagkakahalaga ng Php1,360,000 at nakumpiska rin ang kanyang gamit na Yamaha Mio 125i, marked money na kasama ang bundle ng boodle money na ginamit sa buy-bust.
Mahaharap si alyas “Macmac” sa paglabag ng Republic Act 9165 o Comprehensive Dangerous Drugs Act of 2002.
Tinitiyak naman ni Police Brigadier General Reynaldo Pawid, Regional Director ng PRO 8 na mas lalo pang paiigtingin ang kampanya kontra ilegal na droga at anumang uri ng kriminalidad sa kanilang nasasakupan para manatiling ligtas at mapayapa ang buong Eastern Visayas.
