Matapos ang masusing pagsisiyasat, pormal nang idineklara ng Philippine Drug Enforcement Agency (PDEA) ang Quirino Police Provincial Office (QPPO) bilang drug-free workplace noong Nobyembre 8.
Sa isang simpleng seremonya, nagkaroon ng Unveiling sa Seal of Drug-free Workplace Signage bilang patunay na walang QPPO personnel ang sangkot sa anumang uri ng aktibidad kaugnay sa iligal na droga.
Ang aktibidad ay pinangunahan nina PCol Rommel A Rumbaoa, Provincial Director, QPPO; Director III Joel B Plaza, Regional Director ng PDEA Region 2 na kinatawanan ni Director II Christy Silvan, Assistant Regional Director; IA V Rosario Abbela, Provincial Officer ng Quirino-Santiago.
Kasabay nito, ginawaran ng parangal ang mga tauhan ng Maddela Police Station at QPPO Provincial Intelligence Unit sa matagumpay na pagkaka-aresto sa tatlong (3) High-Value Target at pagkumpiska ng shabu na nagkakahalaga ng Php956,678 sa National Highway, Barangay Malapat ng Cordon, Isabela.
Sa mensahe ni PD Rumbaoa, nagpasalamat siya sa PDEA Region 2 at siniguro na ang kanyang mga tauhan ay mananatiling disiplinado at hindi masasangkot sa iligal na gawain lalo na sa iligal na droga. Hinikayat din niya ang lahat ng kapulisan ng QPPO na magpatuloy sa paggawa ng kabutihan at pagserbisyo ng tapat para sa ikauunlad ng organisasyon at ng buong lalawigan ng Quirino.
###
Panulat ni: Police Corporal Carla Mae P Canapi
