Pinarangalan ang Pulis @ Ur Serbis (PAUS) at Pulis News Network (PNN), bilang Champions of Public Awareness and Community Engagement alinsunod sa Sustainable Development Goal (SDG) 16: Peace and Justice and Strong Institutions sa katatapos lamang na Metro Manila SDG Action Summit 2025 ng Icon of Change nitong April 27, 2025 na ginanap sa Southville International School and Colleges sa Las Piñas City.
Ang PAUS at PNN ay parehong programa ng Police Community Affairs and Development Group na kasalukuyang pinamumunuan ni Police Brigadier General Marvin Joe C. Saro, Director, sa ilalim ng pangangasiwa ng Information and Communication Development Division (ICDD) sa pamumuno ni Police Colonel Byron F. Allatog, Chief, at ng TV and Radio Production Section, na pinagunahan naman ni Police Captain Nomer B. Macaraig, OIC.
Naitatag ang Pulis @ Ur Serbis (PAUS) taong 2012, bilang pangunahing programa ng PNP na naglalayong mas pagtibayin ang ugnayan ng Pambansang Pulisya at komunidad. Ito ay ipinapalabas kada linggo sa UNTV News and Rescue Channel at sa PNP Official Facebook page. Simula nang ito ay maitatag, nakatanggap ito ng sari-saring parangal gaya na lamang ng Anak TV Series Award sa ika-tatlong pagkakataon.
Sumunod namang naitatag ang Pulis News Network (PNN) noong 2023, na ipinapalabas araw-araw sa parehong PNP Official Facebook page, kung saan itinatampok nito ang lahat ng mga kaganapan at accomplishments ng Pambansang Pulisya sa pamamagitan ng mga livestream reports, at iba pang mga special features, at on-the ground correspondents—na kinabibilangan ng mga uniformed officers at iba pang mga indibidwal, upang maghatid ng napapanahong balita, updates at police reports sa buong bansa.
Kabilang sa mga tumanggap ng naturang awards sina PCpt Nomer B Macaraig, PLt Precious Shermaine D Lee, at NUP Loreto B Concepcion kasama ang buong TV and Radio Production Section personnel.
