Tangalan, Aklan – Malugod na tumulong at nagbigay ng serbisyong medikal ang isang pulis ng Aviation Security Group sa isang senior citizen sa Afga, Tangalan, Aklan nito lamang Mayo 3, 2022.
Kinilala ang pulis na tumulong na si Patrolman Lhar Talaga, tauhan ng Caticlan Airport Police Station, PNP AVSEGROUP-AVSEU 6 at ang kanyang tinulungan na matanda na si Mr. Joe Honorio, 62, residente sa nasabing lugar.
Ang nasabing pulis, na nagkataong nag-iisang nurse sa nasabing lugar, ay pinuntahan ng pamilya ni Mr. Honorio sa kanyang tahanan upang humingi ng tulong.
Siya ay hindi nag-alinlangang tumulong at agad nagtungo sa lokasyon ng pasyente upang tingnan ang kanyang kalagayan. Doon nadiskubre ni Patrolman Talaga na wala sa tamang posisyon ang Nasogastric Tube ni Tatay Joe kung kaya inilagay niya ito ng maayos.
Sinamantala rin niya ang pagkakataong ito upang suriin ang kasalukuyang kondisyon ni Tatay Joe at nagbigay ng ilang payo para sa kanyang mabilis na paggaling.
Lubos ang naging pasasalamat ng pamilya Honorio sa ginawang pagtulong ni Patrolman Talaga at umaasa silang ipagpatuloy niya ang ganitong uri ng gawain upang marami pa siyang matulungan sa kanilang lugar.
Madalas din na binibisita ng nasabing pulis ang kanyang pasyente upang kumustahin at siguruhin na nasa maayos na kondisyon ang matanda.
Ipinahayag ni PBGen Andre Perez Dizon, Director ng AVSEGROUP ang kanyang lubos na pasasalamat sa kabutihang ginawa ni Patrolman Talaga.
“Ating paigtingin at palakasin ang ating ugnayang panlipunan sa ating mga nasasakupan sa pamamagitan ng patuloy na pagbabahagi ng mabubuting gawa. Ipakita natin sa kanila na tayo’y madaling lapitan, maayos sa pagseserbisyo, at tunay na maaasahan sa lahat ng oras, kahit pa walang nakamasid,” ani PBGen Dizon.
###
Panulat ni Patrolman Christian Austria
