Pandacan, Manila — Matagumpay at ligtas na napaanak ng isang Pulis Maynila ang isang ginang na hindi na kayang dalhin pa sa ospital kahapon, March 20, 2022.
Ayon kay Police Corporal Burt Benson Abad na nakatalaga sa Manila Police District Police Station 10 (Pandacan), nagsasagawa sila ng Oplan Sita kahapon bandang alas-4:30 ng hapon sa Pandacan, Manila kung saan isang babae ang humingi ng tulong sa kanila dahil ang kanyang amo ay manganganak na at hindi na kaya pang dalhin sa ospital.
Kaya naman, agad na rumesponde sa bahay ng ginang ang Team ni Corporal Abad na masuwerte namang si Abad ay isang Licensed Nurse kaya’t siya na mismo ang nagpaanak sa nasabing ginang at mapalad naman na ligtas ang mag-ina.
Matapos mailabas ang sanggol ay agad nila itong dinala sa Manila Doctor’s Hospital gamit ang kanilang Mobile Car dahil hindi na kakayanin kung maghihintay pa sila ng Ambulansya.
Sa ngayon ay nasa maayos na kalagayan ang mag-ina.
Ani PCpl Abad, malaki ang pasasalamat niya dahil ligtas at maayos niyang naisagawa ang pagpapaanak sa ginang dahil matagal na rin niyang hindi na-practice ang ganitong pangyayari.
###
Panulat ni PCpl Rc Ortenero
