Pagsanjan, Laguna (February 16, 2022) – Arestado ang isang pulis na suspek sa panghoholdap sa isang UniOil Gasoline Station sa Brgy. Santiago, Sto. Tomas, Batangas. Ang tiwaling pulis ay naaresto sa isinagawang checkpoint ng mga kapulisan sa National Highway, Brgy. San Isidro, Pagsanjan, Laguna bandang 2:30 ng madaling araw, Pebrero 16, 2022.
Ayon sa ulat, inireport ng isang gasoline boy ng UniOil Gas Station sa Sto. Tomas City Police Station (CPS) na may nangyaring robbery incident sa naturang gasolinahan. Ayon dito ang suspek ay sakay ng Honda Click na motorsiklo, kulay orange/black at walang plaka, nakasuot ng gray hoodie sweater at jogging pants.
Pinaalerto sa pamamagitan ng radyo ang lahat ng istasyon ng pulisya at agad na inatasan na magsagawa ng checkpoint operations sa buong lalawigan ng Laguna.
Ang mga tauhan ng Pagsanjan Municipal Police Station (MPS) ay nagsagawa ng checkpoint sa kahabaan ng National Highway, Brgy. San Isidro, Pagsanjan, Laguna at dito nila napara ang isang motorsiklo kung saan sakay ang suspek.
Kinilala ang suspek na si Patrolman Glenn Angoluan y Malijan, 33 anyos, nakatira sa #1 San Felix Santo Tomas, Batangas at nakadestino sa 2nd Laguna Police Mobile Force Company (PMFC), Laguna Provincial Police Office (PPO).
Sa pagsasagawa ng custodial investigation, inamin ng suspek na siya ang responsable sa mga naganap na robbery/hold-up incidents ng 7/11 convenience stores sa Laguna at Batangas, partikular sa Pagsanjan, Los Baños, Alaminos at Sto. Tomas, Batangas.
Samantala, hinikayat ang mga mamamayan na makipagtulungan sa mga kapulisan para tugisin ang mga lumalabag sa batas maging sibilyan man ito o empleyado ng gobyerno.
Gayundin, lalo pang paiigtingin ng Pambansang Pulisya ang kampanya laban sa kriminalidad upang mapanatili ang kaligtasan at seguridad ng mga mamamayan.
###
Panulat ni Patrolman Marvin Avila
