Oas, Albay (January 21, 2022) – Nagtangkang mag-suicide ang pulis na suspek sa naganap na kidnapping at pamamaril sa dalawang indibidwal sa Purok 5, Brgy. Maporong Oas, Albay nitong Enero 21, 2022.
Kinumpirma mismo ng Oas Municipal Police Station kung saan pansamantalang nakakulong at sinabing nagpapagaling na sa ospital ang suspek na si Police Corporal Bryan Aguilar matapos sinubukang kitilin ang kanyang buhay gamit ang binakbak na kawayan sa kanyang hinigaan .
Bandang alas-9 nitong umaga, napansin nilang duguan na ang suspek matapos itong maglaslas sa kanyang pulso. Agad naman nila itong idinala sa pinakamalapit na hospital upang bigyan ng lunas.
Napag-alaman sa imbestigasyon na ang nasabing suspek ay may malaking pagkakautang sa Indian National na umaabot ng kalahating milyong pesos. Sinisingil na ng biktima ang suspek ngunit wala pa itong pambayad at dito na naganap ang malagim na pangyayari.
Maliban pa sa malaking pagkaka-utang niya sa bigtime na foreigner, may iba pa itong pinagkakautangan na posibleng ito na ang nagiging rason sa nasabing krimen.
#####
