Tanza, Cavite – Nasawi ang isang pulis at suspek sa buy-bust operation ng Tanza PNP nito lamang Linggo, Abril 24, 2022.
Kinilala ni Police Colonel Arnold Abad, Provincial Director ng Cavite Police Provincial Office, ang nasawing pulis na si Police Corporal John Paul Digma, 34, nakatalaga sa Tanza Municipal Police Station bilang Intelligence Operative habang ang suspek ay kinilala na si Leovildo Mesa Alangilan Jr., 43 at residente ng 535 Barangay Punta 1, Tanza, Cavite.
Ayon kay Police Colonel Abad, bandang 9:50 ng umaga nagsagawa ng buy-bust operation ang Station Drug Enforcement Unit ng Tanza Municipal Police Station sa Casa Nueva, Brgy. Biga Tanza, Cavite kung saan nanlaban ang suspek at nagtangka pang maghagis ng granada kaya nagkaroon ng engkwentro.
Bago tuluyang namatay ang suspek ay nakapagpaputok pa ng baril kung saan tinamaan sa dibdib si PCpl Digma na agad dinala sa Tanza Specialist Hospital ngunit binawian din ng buhay habang siya ay ginagamot.
Narekober sa suspek ang isang Colt caliber 45 na may laman na limang bala, isang 9mm Sig Suer pistol na may siyam na bala, isang basyo ng bala at 12 heat-sealed transparent plastic sachet na naglalaman ng hinihinalang marijuana.
Ang ipinakitang katapangan at sakripisyo ni PCpl Digma sa pagtugon sa krimen ay nagpapakita lang na ang Pambansang Pulisya ay handang tuparin ang sinumpaang tungkulin kahit maging buhay man ang kapalit.
###
Panulat ni Patrolman Jerome Ocampo / RPCADU CALABARZON
