Cagayan – Muling naglunsad ng Project S.A.G.I.P. o Sangga at Gabay Ilalaan para sa Pangarap ng Kabataan na ginanap sa Don Severino Pagalilauan National High School nitong araw ng Miyerkules, ika-31 ng Mayo 2023.
Ang aktibidad ay inisyatibo ni Police Colonel Julio Gorospe Jr., Provincial Director ng Cagayan Police Provincial Office, na naglalayong masagip ang mga kabataan sa posibilidad na mapapabilang sila sa mga kabataang nalulong sa droga, nasangkot sa ilegal na gawain, at naging miyembro ng teroristang grupo.
Aktibong dinaluhan ng mga kabataan, mga guro, lokal na pamahalaan, barangay officials, sektor ng simbahan, mga stakeholders, National Intelligence Coordinating Agency, at Cagayano Cops ang naturang programa.
Samantala, sa mensahe ni Police Lieutenant Colonel Rafael U Pagalilauan, Deputy Provincial Director for Administration, kanyang binigyang diin na ang kahirapan ay hindi dahilan para hindi makapagtapos ng pag-aaral na siyang binabanggit ng rekruter ng terorismong grupo upang maakit ang ilan na sumapi sa kanila.
Inilahad nito na lumaki rin siya sa hirap, naranasang maging gasoline boy upang matustusan lamang ang kanyang pag-aaral. Ang kailangan lang ay magsumikap para sa pangarap.
Dagdag pa rito, ipinaabot niya ang mensahe ni PCol Gorospe, kung saan batid niyang hindi magiging matagumpay ang nasabing proyekto kung walang kooperasyon ang stakeholders, lokal na pamahalaan, at maging ang mga kabataan mismo.
Nagtapos ang aktibidad sa pamamagitan ng paglagda sa Pledge of Commitment sa pagitan ng PNP at mga kalahok para sa maayos at tuloy-tuloy na Project S.A.G.I.P. Kabataan.
Hangad ng Cagayano Cops na wala ng kabataang magiging biktima ng insurhensiya at ilegal na droga sapagkat naniniwala sila ang pag-asa ng ating inang bayan at ang kanilang henerasyon ang magbibigay ng isang tunay na mapayapa at maunlad na pamayanan para sa mga mamamayan.
Source: Cagayan Police Provincial Office
Panulat ni Patrolwoman Juliet Dayag
