Naghatid saya sa isang pamilya ang Project Pabinyag na isinagawa ng Cabatuan PNP sa pangunguna ni Police Major Arturo Cachero na ginanap sa Independent Church of Filipino Christians Parish, Brgy. San Andres, Cabatuan, Isabela noong ika-19 ng Pebrero 2023.
Matagumpay na natupad ang pangarap ng isang batang lalake na si Junel Guitang, 11 taong gulang na nakatira sa Brgy. Rang-ay, Cabatuan, Isabela na mabinyagan sa pamamagitan ng tulong ng Cabatuan PNP.
Ang kanyang mga magulang na sina Joven Guitang at Maricel Guitang ay lubos ang pasalamat sa kapulisan dahil sa tulong na mabinyagan ang anak, sapagka’t hindi nila ito naisagawa noong ito ay maliit pa.
Hindi maikakaila na hirap sila sa buhay dahil nakikisaka lang ang ama ni Junel at housewife naman ang kanyang ina.
Mula sa mga gastusin sa simbahan, mga damit ni Junel sa araw ng binyag hanggang sa mga handa ay sinuportahan ng Cabatuan PNP na lubos na ipinagpasalamat ng kanyang ina.
Labis pang nagpasaya kay Junel ay naging ninong at ninang na din niya ang kapulisan ng Cabatuan PNP at nakatanggap pa siya ng iba’t ibang regalo mula dito na magagamit niya sa kanyang pag-aaral.
Payo kay Junel ng kapulisan na mag-aral ng mabuti at gumawa ng mabuting bagay upang mapagtagumpayan niya ang kaniyang mga pangarap sa buhay.
Layunin ng proyektong ito na masuportahan ang isang batang kagaya ni Junel na hikaos sa buhay ngunit may matibay na pangarap at makatulong sa maralitang pamilya. Ito ay isa sa mga adhikain ng Cabatuan PNP na mapaigting ang relasyon sa komunidad at mapagtibay ang tiwala ng mga mamamayan sa kapulisan.
Source: Cabatuan PS
Panulat ni PSSg Jerlyn V Animos
