Oas, Albay – Inilunsad ng Oas Municipal Police Station ang Project L.A.P.I.S. o ang “Laging Aagapay, Pangarap mo ay Isasakatuparan Sa ano mang hamon ng buhay” na ginanap sa Matambo Elementary School ng Barangay Matambo, Oas, Albay nito lamang Martes, Setyembre 20, 2022.
Ang aktibidad ay pinangunahan ni Police Major Karlo P. Dy, Chief of Police ng Oas MPS katuwang ang Family Juvenile Gender and Development Section ng nasabing istasyon.
Ito ay kaugnay sa Project T.A.N.G.L.A.W. ng Police Regional Office 5 (PRO5) na naglalayong magbigay ng tulong sa mga mag-aaral na mula sa mga pamilyang lubos na nangangailangan upang mabigyan sila ng pag-asa sa pamamagitan ng pagbibigay ng tulong sa kanilang pag-aaral.
Isa sa naging tampok sa programa ay ang dalawang mag-aaral na naging benepisyaryo ng proyekto na hinandugan ng school supplies, Certificate of Scholarship, uniform at sapatos sa pangunguna ni Bb. Karla Jane V. Sebastian, School Principal kasama ang mga kapulisan ng nasabing himpilan.
Sa pamamagitan ng aktibidad na ito, naipapakita ng PNP ang malasakit sa mga mag-aaral na handang tulungan sa pag-abot ng kani-kanilang mga pangarap sa buhay.
Source: Oas Mps Albayppo
Panulat ni Pat Rodel Grecia
