Sa kabila ng inilabas na Temporary Restraining Order (TRO) ng Davao City Regional Trial Court (RTC) Branch 15 nito lamang Martes, nanindigan ang Police Regional Office 11 na naaayon lamang sa batas at legal na proseso ang lahat ng ipinapatupad na law enforcement operation sa mismong compound ng Kingdom of Jesus Christ (KOJC).
Ayon kay Police Major Catherine Dela Rey, Spokesperson ng PRO 11, ang operasyong isinagawa upang arestuhin si KOJC leader Apollo Quiboloy ay naaayon lamang sa legal na proseso at walang nilabag na kahit anong batas at karapatang pantao.
Aniya, “PRO-11 is continuously performing its law enforcement operations at KOJC, and we strictly abide by the proper protocols and standards for lawfully carrying out our mandates.”
Bagamat matiwasay na tinanggal ng PRO 11 ang mga barrier kabilang na ang nakalagay sa main entrance ng KOJC compound bilang pagtalima sa ibinabang TRO ng RTC Branch 15, siniguro pa rin ng pamunuan na tuloy-tuloy pa rin ang pagsasagawa nila ng police operation upang hulihin si Quiboloy, na wantedsa iba’t ibang kaso.
“The PRO 11 is committed to respecting the rule of law, safeguarding human rights, and complying with the police operational procedures. In as much as there is no cease and desist order from the Amparo court, we will continue implementing the arrest warrant,” dagdag pa ni PMaj Dela Rey.
Source: www.pna.gov.ph
