Oriental Mindoro – Namahagi ng mga pagkain sa mga pamilyang naapektuhan ng oil spill ang Philippine Amusement and Gaming Corporation (PAGCOR), katuwang ang mga kapulisan ng Regional Community Affairs and Development Division (RCADD), na ginanap sa Mena Valencia Gymnasium sa Brgy. Poblacion 1, Naujan, Oriental Mindoro noong Lunes, Hunyo 19, 2023.
Ang aktibidad ay pinangasiwaan ng mga tauhan ng RCADD sa pangunguna ni PLtCol Sonia Gaviana, Asst. Chief, RCADD, at Mr. Tengco, Chairman, CEO, PAGCOR na nirepresenta ni G. Eric Balcos, Asst. President, CRSD.
Layunin ng aktibidad na magbigay ng tulong sa mga apektadong pamilya at maibsan ang kanilang sitwasyon pagkatapos ng oil spill.
Sa isang pahayag, binigyang-diin ni Police Brigadier General Joel Doria, Regional Director ng PRO MIMAROPA, na ang PRO MIMAROPA ay nakatuon sa pakikipagtulungan sa mga katuwang na ahensya at mga stakeholder upang magbigay ng kinakailangang tulong at suporta sa mga nangangailangan.
“Narito kami upang paglingkuran at protektahan ang komunidad, at patuloy naming gagawin ito sa pamamagitan ng pakikipagtulungan sa aming mga kasosyo at stakeholder. Ang inisyatibo na ito ay naaayon sa 5-Focused Agenda ng 29th Chief PNP, PGen Benjamin C Acorda, Jr, partikular sa community engagement,” ani pa ni PBGen Doria.
Gayundin, nagpahayag ng pasasalamat si PBGen Doria sa PAGCOR sa suporta nito sa pagbibigay ng tulong sa mga apektadong pamilya.
“Kami ay nagpapasalamat sa PAGCOR sa pakikipagtulungan sa amin sa gawaing ito. Ang pamamahagi ng mga pagkain na ito ay isang manipestasyon ng aming pangako na paglingkuran at protektahan ang komunidad, lalo na sa mahirap na panahon,” dagdag pa ni PBGen Doria.
Panulat ni Patrolman Erwin Calaus
