Nakaalerto ang buong hanay ng Police Regional Office Cordillera Administrative Region bilang paggunita sa unang araw ng Undas 2024 nito lamang Nobyembre 1, 2024.
Buong pwersa ng Cordillera PNP sa pamumuno ni Police Brigadier General David K Peredo Jr., PRO CAR Regional Director, kasama ang Bureau of Fire Protection, Philippine Army, Advocacy Support Group at iba pang ahensya ng gobyerno.
Kaugnay nito, nagpakalat at nagdeploy ang mga pulis sa mga pampubliko at pribadong sementeryo, pati na rin sa mga terminal at sa buong rehiyon ng Cordillera upang siguraduhin ang kaligtasan at seguridad ng mamamayan.
Naglagay din ng mga Police Assistance Desk (PAD) upang may malapitan ang mga mamamayan para sa anumang problema o sitwasyon sa loob ng sementeryo.
Mahigpit na ipapatupad ng PNP ang pagbabawal sa pag-inom ng alak, pagsusugal, pagdadala ng matutulis na bagay at baril, pagpapatugtog ng malakas na musika, at iba pang pinagbabawal na aktibidad sa loob ng mga sementeryo. Ang mga mahuhuling lalabag ay may kaukulang parusa.
Patuloy rin ang Pambansang Pulisya sa pagpapakalat ng mga infographics na naglalaman ng mga crime prevention at safety tips para sa kaligtasan ng mga mamamayan ng rehiyon ng Cordillera.
