Cotabato City – Pinaigting ng Police Regional Office Bangsamoro Autonomous Region ang seguridad dahil sa lumalalang tunggalian sa politika sa Cotabato City, Linggo, Mayo 8, 2022.
Binisita ni Police Brigadier General Pablo Labra II, Deputy Regional Director for Administration at Commander ng Regional Special Operation Task Group Cotabato City at Maguindanao (RSOTG CoMag) upang personal na pangasiwaan ang lahat ng operasyon ng pulisya upang makatulong na maiwasan at matugunan ang mga insidente na may kinalaman sa halalan sa lungsod kung saan umiiral ang matinding tunggalian sa pulitika.
Dinagdagan naman ng mga puwersang panseguridad ang mga checkpoint at pagpapatrolya sa paligid ng lungsod.
Dagdag pa, inilagay din ang pinaigting na police visibility at Quick Reaction Team para sa agarang pagtugon kung kinakailangan.
Umapela ang PRO BAR sa lahat ng mga kandidato at mga botante na itigil ang mga labag sa batas na gawain dahil ito ay taliwas sa konstitusyon at ang mga lumalabag ay maaaring humarap sa pag-uusig.
Ang sinumang indibidwal o tao na lalabag sa mga ipinagbabawal na gawain sa panahon ng halalan ay mapaparusahan.
Samantala, umapela naman si Police Brigadier General Arthur Cabalona, Regional Director, PRO BAR, sa mga kandidato na magsagawa ng kanilang mga aktibidad sa mapayapang paraan alinsunod sa probisyon ng mga patakaran ng COMELEC.
Tinitiyak ng Regional Director sa publiko na ang lahat ng tauhan ng PRO BAR ay mananatiling apolitical at non-partisan, at inuulit na ang PRO BAR ay nakatuon upang matiyak ang isang Secure, Accurate, Free and Fair 2022 National and Local Elections.
###
Panulat ni Patrolman Charlie Nasroden Corpuz
