Camp Ruperto Kangleon, Palo, Leyte – Nagpadala ang Police Regional Office 8 ng karagdagang 100 na mga pulis para sa Samar Police Provincial Office sa isinagawang Send-Off Ceremony na ginanap sa PRO 8 Grandstand, Camp Kangleon, Palo, Leyte noong Lunes, May 2, 2022.
Ang naturang seremonya ay pinangunahan mismo ni Police Brigadier General Bernard Banac, Regional Director ng PRO 8. Ayon sa kanya, ang 100 personnel ay nagmula sa Regional Headquarters na bahagi ng paghahanda sa seguridad ng PRO 8 para sa May 9 National and Local Elections.
Ang nasabing karagdagang puwersa ay mangangasiwa sa mga voting precincts at sa mga concern areas sa buong lalawigan ng Samar.
Sa kasalukuyan, nasa 632 tauhan na ang naka-deploy sa mga lugar ng Samar pa lamang.
Dumalo rin sa seremonya sina Police Lieutenant Colonel Doughlas Antonio Eloja, Assistant Chief, Regional Operations Division; Police Lieutenant Colonel Jennifer Sumpo, Assistant Chief, Regional Personnel Records Management Division (RPRMD); at Police Lieutenant Colonel Teddy David, Regional Pastoral Office.
Mensahe naman ni PBGen Banac, “Habang papalapit ang halalan, magpapadala pa tayo ng mas maraming pulis para sa mga tungkulin sa darating na halalan. Gayundin, asahan ang mas pinaigting na checkpoints, foot at mobile patrols sa buong Eastern Visayas mula ngayon”.
###
Panulat ni Patrolwoman Rialyn B Valdez
