Tinatayang 281 na indibidwal ang naaresto sa isinagawang Anti-Criminality Campaign ng PNP Central Visayas na nagresulta sa pagkakakumpiska ng mahigit Php2 milyong halaga ng ilegal na droga at pagkakasamsam ng iba’t ibang uri ng kalibre ng baril.
Pinuri ng pamunuan ng PRO7 sa ilalim ni PBGen Anthony A Aberin, Regional Director, ang mga operating unit sa kahanga-hangang tagumpay at diskarte na nagpapatunay sa kakayahan ng kapulisan sa mga operasyon.
Sa ulat na naitala mula Oktubre 29 hanggang Nobyembre 4, 2023, may kabuuang 365.65 gramo ng shabu na may Standard Drug Price na Php2,484,420, marijuana na tumitimbang ng 1,130.65 gramo na nagkakahalaga ng Php135,660 ang nakumpiska sa 51 anti-illegal drug operation na ikinasa kung saan 72 drug suspek ang naaresto.
Dagdag pa rito, dalawang Most Wanted Person at 20 pang wanted person ang naaresto sa manhunt operation.
Sa patuloy na pagpapalakas ng PRO 7 sa kampanya laban sa loose firearms, 24 na mga hindi lisensyadong baril, bala, at apat na pampasabog ang nasamsam at isinuko sa mga himpilan ng kapulisan.
Samantala sa masusing hakbang laban sa illegal gambling, 172 na indibidwal ang naaresto at narekober ang Php21,592.00 bet money.
“Patuloy nating paiigtingin ang ating mga operasyon sa suporta ng iba pang law enforcement units, partner agencies, at lalo na ng komunidad sa walang tigil na kampanya laban sa lahat ng uri ng kriminalidad sa Central Visayas,” ayon kay PBGen Aberin.
