Camp Crame, Quezon City – Kasado na ng Philippine National Police ang post-election plan nito sa mga posibleng mangyaring gulo pagkatapos mismo ng eleksyon ngayong araw ayon sa pahayag ng bagong talagang Officer-in-Charge ng PNP Police Lieutenant General Vicente D Danao Jr. sa kanyang press briefing nito lamang Lunes ng umaga, Mayo 9, 2022.
Ang kahandaan ng pulisya sa pagpapatupad nito ay upang siguraduhin na walang magiging balakid kahit na ang National and Local Elections ay tapos na.
Binigyang linaw din ni PLtGen Danao Jr., na ang lahat ng miyembro ng PNP ay mananatili sa kanyang tungkulin bilang isang alagad ng batas, na kung sinuman ang hindi tumalima rito ay haharap sa kaukulang parusa mapa-administratibo man yan o criminal na kaso.
Kanya ring ipinahayag na hindi hahayaan ng kanyang mga tauhan na magkagulo sa kanilang mga binabantayang lugar at handa ang kanyang hanay sa pagbibigay ng seguridad sa lahat ng botante at mga tumatakbong pulitiko.
Mahigpit ding pinababantayan ni General Danao ang mga posibleng mangyari na rally o protesta pagkatapos ng botohan na maaaring humantong o magdulot ng kaguluhan lalo na ang mga supporters ng iba’t ibang panig ng mga pulitiko.
Nagbabala din siya sa mga nagbabalak na magpoprotesta na gagamit ng dahas gaya na lamang ng mga naninira ng mga ari-arian, namamato, nanakit, at humihiga sa kalsada na nagiging sanhi ng matinding trapik na maaari nilang ipahayag ang kanilang mga damdamin ngunit hindi sa ganitong paraan.
“Pero if you just airing your grievances naman, kung merun man, wala namang problema yan sabi nga, we have the freedom of speech to do it, but please do not harm anyone and do not destroy any property”,” dagdag pa ni General Danao Jr. sa mga nagbabalak na mag-rally na mga supporters pagkatapos ng eleksyon.
###
Panulat ni PCpl Jhoanna Marie Najera-Delos Santos
