Nagpulong ang Philippine National Police (PNP) para sa ikalawang pagpupulong ng Critical Incident Management Committee (CIMC) noong Marso 5, 2026 sa PNP Multi-Purpose Center sa Camp BGen Rafael T Crame, Quezon City.
Pinangunahan ang pulong ni PLtGen Edgar Alan O. Okubo, Deputy Chief PNP for Operations at Vice Chairperson ng CIMC, kasama ang mga pangunahing tanggapan at yunit ng PNP upang higit pang patatagin ang koordinasyon sa pagtugon sa mga kritikal na insidente.
Sa nasabing pulong, tinalakay ng mga opisyal ang kasalukuyang kakayahan ng PNP sa operasyon, kabilang ang mga hakbang upang mapahusay ang koordinasyon at reporting system sa mga usaping may kinalaman sa kaayusan at seguridad.
Sinuri rin ang mga ipinatupad na security measures sa mga nagdaang malalaking kaganapan at pampublikong paggunita upang matiyak ang kaligtasan ng mamamayan.
Ibinahagi rin sa pagpupulong ang mga update sa patuloy na pagtugon ng PNP sa mga natural hazards, kabilang ang volcanic activities at iba pang sakuna. Layunin nitong mas mapalakas ang kahandaan ng kapulisan sa pagresponde sa mga emerhensiya at matiyak ang agarang proteksyon sa publiko sa panahon ng krisis.
Binigyang-diin ng PNP na ang patuloy na pagpaplano at pakikipagtulungan ng mga yunit nito ay mahalaga upang mapanatili ang mataas na antas ng operational readiness. Ito ay bahagi ng pagsulong ng layunin sa ilalim ng programang “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
