Sa pinagsanib na pwersa ng Philippine National Police at Philippine Drug Enforcement Agency (PDEA), nalambat kagabi ang humigit kumulang dalawang kilo ng hinihinalang shabu sa Jolo, Sulu.
Ayon sa kapulisan, ang naturang kontrabando ay nasabat bandang 7:30 ng gabi ng Setyembre 12, 2024 sa Barangay San Raymundo, Jolo, Sulu sa isinagawang buy-bust operation ng PDEA Sulu Provincial Office at Sulu PPO Intelligence Unit.
Samantala, arestado naman ang apat na indibidwal na pawang mga naging pangunahing target ng operasyon.
Kabilang sa mga nahuli sa mga suspect ay ang dalawang supot ng puting mala kristal na “substance” na hinihinalang shabu at mayroong national value na P13,600,000.00,buy-bust money, isang yunit ng pulang XRM na motor, at iba’t ibang patunay ng pagkakakilanlan.
Matapos basahan ng kanilang karapatan sa wika na kanilang nauunawaan, ang mga nadakip ay dinala sa PDEA Sulu Provincial Office upang imbestigahan at isailalim sa tamang proseso kaugnay ng mga kasong isasampa laban sa kanila.
Ayon sa kapulisan, ang naturang operasyon ay bahagi ng kanilang walang humpay na kampanya laban sa kriminalidad at ilegal na droga sa kapuluan ng Sulu.
