Ang tanging hangad ng Philippine National Police (PNP) ay arestuhin ang mga taong wanted, hindi ang religious group na Kingdom of Jesus Christ (KJC) at ang mga tagasuporta nito, ito ay ayon kay Police Brigadier General Roderick Alba nitong Miyerkules, Agosto 28, 2024.
Naglabas ng pahayag si PBGen Alba, Principal Spokesperson ng Special Task Force Teknon Alpha, sa gitna ng tensyon sa pagitan ng kampo ng fugitive televangelist at KJC founder na si Apollo Quiboloy at ng mga pulis sa Davao City.
“Hindi namin hangad ang simbahan o kahit ang mga tagasuporta nito, ang hangad namin dito ay ang mga taong may standing warrant of arrest mula sa korte,” ani PBGen Alba sa interview niya sa Radyo 630.
Pinaalalahanan din ni PBGen Alba ang KJC na ginagawa lamang ng mga pulis ang kanilang trabaho.
“Mandato po namin na siguraduhin ang kaligtasan at seguridad ng lahat, di natin alam kung sino yung pumapasok at lumalabas diyan sa KJC compound. We have to check and to ensure na wala pong makakatakas kung may mahuli po tayong subject of the arrest warrant,” dagdag pa ni PBGen Alba.
Source: inquirer.net
