Isinailalim na sa Full Alert Status ang buong hanay ng Philippine National Police (PNP) simula ngayong araw, ika-3 ng Mayo, hanggang ika-15 ng Mayo, 2025 bilang pagsunod sa direktiba ni Pangulong Ferdinand R. Marcos Jr. para sa maayos at ligtas na pagdaraos ng 2025 National and Local Elections.
Tiniyak ni PNP Chief, Police General Rommel Francisco D. Marbil, ang kahandaan ng kapulisan, katuwang ang ibang ahensya ng gobyerno, para tiyaking magiging mapayapa, malinis, at maayos ang darating na halalan.
Aniya, “Buong puwersa ng ating kapulisan ay handang panatilihin ang kapayapaan at kaayusan ngayong election period. Katuwang natin ang COMELEC at iba pang ahensya ng gobyerno upang masiguro na marerespeto ang boses ng mamamayan at hindi mapipigil ng karahasan ang halalan.”
Mas paiigtingin din ang presensya ng pulisya sa mga voting centers at mga critical areas sa iba’t ibang rehiyon. Maging ang lahat ng Reactionary Standby Support Forces (RSSF), Quick Reaction Forces (QRF), at mga regional units ay naka-standby at handang tumugon sa anumang insidente.
Patuloy na pinagtitibay ng PNP ang kanilang paninindigan na ipatupad ang batas, suportahan ang Commission on Elections (COMELEC), at tiyaking ligtas at malaya ang pagboto ng bawat Pilipino.
