Nakakuha ng mataas na Trust and Performance Rating ang Pambansang Pulisya mula sa resulta ng katatapos lamang na Tugon ng Masa Survey na isinagawa ng OCTA Research nitong nakaraang Marso 24-28, 2023.
Lumalabas sa resulta ng survey na karamihan pa rin sa mga Pilipino ang naniniwala at sumusuporta sa Pambansang Pulisya sa patuloy na pagpapatupad ng organisasyon sa mga tungkulin at alituntunin nito.
Tinatayang nasa walo sa sampung Pilipino o (80 %) sa buong bansa ang patuloy na naniniwala sa PNP at suportado ang mga programa at adhikain nito sa bansa.
Samantala, nasa 41 percent naman ng mga Pilipino ang naniniwalang mayroon ng pagbabago sa mga programa ng himpilan lalo na sa pagpapatupad ng kapayapaan at kaayusan at sa paglaban sa kriminalidad.
Nagpasalamat naman ang buong himpilan sa mga kinatawan ng OCTA research at sa publiko sa positibong resulta ng isinagawang survey at tiniyak na mas pag-igihan pa ng buong organisasyon ang paghahatid ng patas, tapat at may integridad na serbisyo publiko para sa bayan at sa lahat ng mga mamamayang Pilipino.
