Inilunsad ng Philippine National Police (PNP), sa pamamagitan ng Joint Anti-Fake News Action Committee (JAFNAC), ang imbestigasyon sa umano’y disinformation sa sinasabing pagkidnap sa ilang high-profile Chinese business personalities.
Ito ay kasunod sa direktiba ni Pangulong Ferdinand R. Marcos Jr. na labanan ang pagkalat ng disinformation sa ilalim ng kanyang governance agenda.
Ang JAFNAC ay pinangungunahan ni PLtGen Robert Rodriguez, Deputy Chief PNP for Operations, na nakikipagtulungan sa PNP Anti-Cybercrime Group (ACG) para sa isang masusing pagsisiyasat upang matukoy at mapanagot ang mga responsable sa pagpapakalat ng walang basehan at malisyosong impormasyong ito.
Sinabi ni PNP Chief PGen Rommel Francisco D. Marbil na ang paglikha ng JAFNAC ay isang proactive na hakbang upang ma-institutionalize ang koordinasyon, pagsubaybay, at mabilis na diskarte sa pagtugon kontra disinformation sa lahat ng platforms.
“Hindi kami magpapahinga hangga’t hindi namin natutuklasan ang mga indibidwal sa likod ng mga gawa-gawang ulat na ito. Gagamitin ng PNP ang lahat ng legal at operational na paraan upang mahanap at tiyaking sila ay mananagot. Walang puwang ang disinformation sa bansang ito,” ani PGen Marbil.
Pinaalalahanan din ni ng Hepe ang publiko, kabilang ang mga vlogger, content creator, at social media influencers, na maging responsable at maingat kapag nagpo-post ng content online.
Dagdag pa niya, mahalagang iberipika ang impormasyon bago ito ibahagi, lalo na ang mga may kinalaman sa mga maseselang bagay tulad ng pambansang seguridad at kaligtasan ng publiko.
