Kasabay ng Traditional Monday Flag Raising Ceremony ngayong araw, tumanggap ng full scholarship ang walong (8) pulis mula sa Ateneo De Manila University.
Bawat isa ay nakatanggap ng Certificate of Scholarship na iginawad ni PNP Chief, Police General Guillermo Lorenzo T. Eleazar; Atty. Vitaliano Aguirre II, Vice Chairman at Executive Officer ng NAPOLCOM; Dr. Ronald U Mendoza, Dean ng Ateneo School of Government; at Pastor Cirilo A Sazon, na kinakatawan ang Bless Our Cops Movement, Inc. (BOC).
Ang full scholarship ay iginawad sa mga kwalipikadong PNP personnel matapos sumailalim sa masusing screening. Ang mga iskolar ay mag-aaral ng Master in Public Management sa ilalim ng PNP, Ateneo-de Manila University-School for Government (ASoG) at Bless Our Cops Emerging Leaders Fellowship Grant na naglalayong paunlarin ang kaalaman at tulungang makapagtapos ang mga pulis na kalaunan ay magagamit para sa kanilang tungkulin at mandato.
“Taos-puso akong nagpapasalamat sa Ateneo de Manila University School of Government at Bless Our Cops Movement Inc. para sa pagpapaabot ng napakagandang prebilehiyo at pagkakataon sa mga kapulisan. Para sa patuloy na suporta sa programa ng pag-aaral at paglago ng PNP at para sa kapakinabangan ng bawat miyembro ng organisasyon,” ani Chief PNP sa kanyang mensahe.
Samantala, inilunsad ng PNP ang Internal Disciplinary Mechanism Information System (IDMIS) na gagamitin upang mas mapaigting ang pagpapatupad ng Intensified Cleanliness Policy (ICP) partikular sa “Cleanliness in the Ranks”.
Sa pahayag ni PGen Eleazar, ang electronic system ay tinuturing niyang tagumpay upang mas mapalakas at matulungan sa pagtukoy ng preventive, punitive at restorative approach ang Internal Affairs Service (IAS) sa kanilang hakbang para sa pagdidisiplina sa mga tauhan ng PNP.
Gayundin, itinanghal sa naturang seremonya ang League Magazine kung saan tampok si PGen Eleazar sa front cover nito. Nilagdaan din ang Deed of Donation na tinanggap ng PNP mula sa iba’t ibang stakeholders at ibinida ang Php818-M halaga na mga bagong sasakyan ng PNP.
######
Panulat ni: Police Corporal Josephine T Blanche
