Hindi magpapatupad ng anumang Warrant of Arrest mula sa International Criminal Court o ICC ang Pambansang Pulisya, iyan ay bilang pagtalima sa direktiba ni President Ferdinand R. Marcos Jr., na hindi tutulong ang pamahalaan sa anumang isinasagawang imbestigasyon ng ICC sa bansa.
Sa isang interview noong Enero 23, 2024, mariing sinabi ni Pangulong Marcos na hindi niya kinikilala ang jurisdiction ng ICC sa loob ng Pilipinas. Aniya: “I consider this as a threat to our sovereignty. Therefore, the Philippine government will not lift a finger to help any investigation that the ICC conducts.”
Sinabi rin ng Pangulo na mananatiling alerto ang pamahalaan sa pagbabantay sa ICC upang hindi ito magkaroon ng anumang ugnayan sa iba’t ibang ahensya ng pamahalaan.
Ayon naman kay Solicitor General Menardo Guevarra, ang PNP lamang kasama ang iba pang mga law enforcement officer sa bansa ang bukod-tanging makapagpatupad ng Warrant of Arrest sa loob ng teritoryo ng Pilipinas.
Dagdag pa niya na ang pahayag ng Pambansang Pulisya na hindi ito magpapatupad ng Warrant of Arrest mula sa ICC ay simpleng pagtalima lamang sa kautusan ng Pangulo bilang Commander-in-Chief at bilang pinuno ng executive department.
Samantala, matatandaan namang dati ng kumalas ang Pilipinas sa ICC mula pa noong Marso 17, 2019.
Source: https://www.pna.gov.ph/articles/1218519
