Aabot sa 6,426 na indibidwal mula sa iba’t ibang bayan sa Isabela ang naitalang lumikas sa mga evacuation centers sa probinsya dahil sa epekto ng bagyong Kristine sa ulat ng Isabela PNP.
Ayon kay Police Colonel Lee Allen B Bauding, Provincial Director ng Isabela Police Provincial Office (IPPO), hanggang sa kasalukuyan, mulat at nakaalerto pa rin anya ang buong pwersa ng kapulisan sa Isabela para sa pagtugon sa pananalasa ng bagyong Kristine kung saan naglandfall na ito kagabi sa Lalawigan ng Isabela.
Ibinahagi ng Provincial Director na ang naturang bilang ng mga evacuees ay galing sa mga mabababang lugar na madalas mabaha at makapagtala ng pagguho ng lupa.
Kaugnay nito, hinihikayat ang mga residente na nasa danger zone na lumikas na sa mga evacuation areas para hindi malagay sa panganib ang buhay.
Samantala, layunin ng IPPO ang zero casualty ngayong panahon ng bagyo kaya’t minabuti ni PCol Bauding na pangunahan ang 24 oras na pagmonitor sa buong probinsya para matiyak ang kaligtasan ng bawat Isabelino.
Source: PNP Isabela
