Cauayan City, Isabela – Ipinagdiwang ng PNP Class Matalikas ang kanilang pangalawang anibersaryo sa pagseserbisyo sa pamamagitan ng isang Community Outreach Program na ginanap sa Brgy. Sillawit, Cauayan City, Isabela nito lamang Biyernes, Hulyo 1, 2022.
Ang aktibidad ay may temang “Klase na Hinamon ng Pandemya, Nagkakaisa sa Matuwid na Pulisya” na aktibong dinaluhan ni Gng. Maria Juana Yadao, City Nutrition Action Officer sa siyudad at mga opisyales ng nabanggit na barangay.
Namigay ang mga pulis ng oral hygiene kits sa 50 benepisyaryo at anim naman na mula sa pinakamahirap na pamilya sa lugar ang nakatanggap ng 25 kilong bigas.
Bukod dito, nagkaroon din ng feeding program para sa mga dumalo sa nasabing aktibidad.
Bilang pagsasabuhay naman sa PNP Core Value na Pulis Makakalikasan, nagsagawa din ang Class Matalikas ng isang tree planting activity kung saan nakapagtanim sila ng 50 pirasong mahogany seedlings.
Samantala, siniguro naman ni Pat Ralph Calucag, presidente ng klase na sa kabila ng mga pagsubok at hamon na kanilang kakaharapin sa pagseserbisyo sa bayan ay mananatili silang tapat sa kanilang tungkuling magpaabot ng serbisyong may malasakit at puso sa bawat Pilipino.
Source: PNP Class Matalikas
###
