Camp Crame – Nagpahayag ng pagsuporta ang Hepe ng Pambansang Pulisya sa isinagawang press conference ni SILG, Atty. Benjamin C. Abalos Jr., sa PNP Multi-Purpose Center, Camp BGen Rafael T. Crame, Quezon City nito lamang ika-4 ng Enero 2023.
Sa naganap na presscon, ay umapela si Atty. Abalos sa lahat ng full Colonel at Generals na magsumite ng Courtesy Resignation sa binuong Five (5) committee upang masusing masala kung sino ang may koneksyon o may kinalaman sa kalakalan ng ilegal na droga.
“Alam ko mabibigla kayo pero this is the only way to make a fresh start, mahirap lumaban sa giyera na ultimo ang kakampi mo ang babaril sa likod mo, we have this moral obligation sa ating mga kababayan, na kahit anong bahid ng droga ay wala tayo, para tayo ay maging epektibo”, saad ni SILG.
Ang PNP, sa pangunguna ng Hepe, Police General Rodolfo S Azurin Jr, ay kaisa ni SILG sa kanyang magandang hangarin na linisin ang hanay ng PNP at alisin sa organisasyon ang kakaunting scalawags.
Tiwala din ang buong hanay na ang mga pagtatasa at pagsusuri na gagawin sa mga miyembro ay magiging patas at walang kinikilingan sa buong proseso.
Ang Hepe ng PNP, ang siya mismong mauunang magsumite ng sarili sa nasabing proseso ng assessment at evaluation. Higit sa lahat, buo ang pananampalataya ng PNP sa karunungan ni Secretary Abalos at ng ating mga pinuno na laging nakatutok sa ikabubuti ng organisasyon ng PNP at ng bansa.
Nilinaw naman ni Atty. Abalos na habang isinasagawa ang buong proseso ng pagsusuri, ay patuloy at obligado pa rin ang mga kapulisan na gampanan ang kani-kanilang mandato.
