Timbog ang isang negosyante sa kasong pagpatay at kabiguang magpakita ng wastong dokumento sa paglalakbay, na lumalabag sa Seksyon 6(1)(c) ng batas sa Imigrasyon ng Malaysia sa ikinasang operasyon ng PNP at Royal Malaysia Police matapos lumapag ang sinasakyang eroplano ng suspek sa NAIA Terminal 3, Pasay City nito lamang Abril 11, 2025.
Ang operasyon ay pinangunahan ni Police Brigadier General Jean S Fajardo, Regional Director ng Police Regional Office 3, katuwang ang Aviation Security Group-NAIA, San Fernando City Police Station, at Philippine Police Attaché sa Malaysia na si Police Colonel Excelso Lazaga Jr., sa paghahain ng Mutual Assistance in Criminal Matters (MACM) request, na sinang-ayunan naman ni Malaysian Police Commissioner Datuk Ts. Ahmad Ramdzan bin Daud.
Kinilala ang suspek na si alyas “Alan”, 51 anyos, at residente ng Greenhills, San Juan City.
Ang suspek ay una nang naaresto ng Special Investigation Branch ng Petaling Jaya District Police sa Selangor, Malaysia noong Marso 22, 2025 nang mabigong magpakita ng wastong dokumento sa paglalakbay, na lumalabag sa Seksyon 6(1)(c) ng batas sa Imigrasyon ng Malaysia at may umiiral na Interpol Red Notice laban sa suspek mula Enero 2020.
“This mission reflects the PNP’s unyielding resolve to bring criminals to justice, wherever they may flee. Our productive collaboration with the Royal Malaysia Police and our diplomatic representatives in Malaysia shows that no fugitive is beyond the reach of law enforcement when nations stand united against crime,” saad ni PBGen Fajardo.
