Nilagdaan ng Philippine National Police (PNP) at National Bureau of Investigation (NBI) ang isang Memorandum of Agreement (MOA) para sa pormal na imbestigasyon ng mga illegal drugs operation ng pulisya sa nakalipas na 5-taon.
Sa isang simpleng seremonya na ginanap sa Department of Justice (DOJ), nilagdaan ni Police General Guillermo Lorenzo T. Eleazar at Director Eric B. Distor, Officer-In-Charge ng NBI ang naturang kasunduan noong November 3.
Ang MOA ay magbibigay-pahintulot sa dalawang partido na kasuhan ang mga pulis na mapapatunayang lumabag sa batas sa pagsasagawa ng mga operasyon kontra iligal na droga.
Nakasaad sa kasunduan na kinakailangang maglabas ng buo at konkretong report at rekomendasyon ang PNP at NBI kaugnay sa kanilang imbestigasyon.
Magtatalaga ng representante ang bawat ahensya na bubuo sa PNP-NBI Joint Investigation Team na magkakaroon ng pagpupulong kada buwan.
Nasa 52 cases ang kinasasangkutan ng 154 police officers ang unang iimbestigahan ng PNP-NBI Joint Investigation Team. Ang mga naturang kaso ay nirepaso na ng DOJ at inirekomenda para sa karagdagang imbestigasyon at case build-up.
“The signing of this Agreement is proof of the PNP’s commitment to transparency and accountability and in order to finally settle the allegations of human rights abuses that have been hounding the government’s aggressive campaign against illegal drugs since July 2016,” ani PGen Eleazar.
“Through this agreement, we will be able to ferret out the truth and correct the wrong impression that all our operations relating to illegal drugs campaign are tainted with human rights abuse. Napakalaki ng sakripisyo ng ating kapulisan sa kampanyang ito at marami din kaming kasamahan na nagbuwis ng buhay at nasugatan sa aming mga operasyon,” dagdag pa niya.
Ayon pa kay Eleazar, ang anti-illegal drugs campaign ay nagresulta sa pagkakumpiska ng bilyun-bilyong halaga ng iligal na droga, pagkabuwag ng shabu laboratories at drug den, at pagkaaresto ng mga sindikato na sangkot sa illegal drugs smuggling sa buong bansa.
Gayundin, malaki ang naging ambag nito sa pagbaba ng Index Crime ng halos 70% sa nakaraang 5-taon.
###
Panulat ni: Police Corporal Josephine T Blanche
