Nasa kabuuang 153 cybercrimes suspect ang tagumpay na naaresto ng PNP Anti-Cybercrime Group sa loob lamang ng buwan ng Abril.
Ayon kay PNP ACG Director, Police Brigadier General Bernard Yang, nakapagsagawa rin sila ng nine entrapment operations sa pakikipagtulugngan sa Philippine Dental Association laban sa mga fake dentists, na nagresulta sa pagkaaresto sa 14 indibidwal.
“Actually, marami na pong nagbe-venture into this kind of illegal activity at nakita nilang medyo lucrative itong illegal business na ito,” dagdag pa niya.
Isa sa mga naarestong fake dentist ay isang 25-year-old na lalake na nahuling nag-iinstall ng dental braces sa isang police officer na nagpapanggap lamang na pasyente sa isang hotel sa Cotabato City.
Sinabi ni PBGen Yang na ang naturang indibidwal ay wala ni umanong formal training o nag-aral ng dentistry at natuto lang sa pamamagitan ng mga online resources. Kadalasan sa kaniyang mga kliyente ay mga estudyante na nagbabayad lang ng mura para sa naturang dental service.
Sa kabilang banda, tagumpay ding narescue ng PNP ACG ang 11 menor de edad na biktima ng online sexual abuse at trafficking in persons sa kanilang ipinatupad na 159 operations.
Dagdag pa ni PBGen Yang na ang pagkaaresto ng naturang mga suspek ay resulta ng maagap at komprehensibong cyber patrolling ng PNP-ACG.
Samantala, pinaalalahanan naman ng PNP ACG ang publiko sa mga posibleng mangyaring panganib kung sila ay sasailalim sa naturang mga dental services o parehong mga procedures mula sa mga unlicensed individuals, kahit mura pa ang mga ito.
“Ang mga pekeng dentista na ito na nag-aalok ng serbisyo walang lisensya ay maaaring magdulot ng malubhang panganib, kabilang na ang mga komplikasyon sa kalusugan, financial loss, infections, at pangmatagalang pinsala sa inyong mga ngipin. Kung may nalalaman kayong sinumang nag-aalok ng hindi awtorisadong dental services, agad itong iulat sa pinakamalapit na tanggapan ng ACG [maging sa ibang ng opisina ng PNP] para sa naaangkop na aksyon,” saad ni PBGen Yang.
