Naglunsad ng dalawang makabagong proyekto ang Laguna PNP na tinawag na PNP A.L.E.R.T. (Avid Laguna Emergency Response Team) Button at PCRM (Police Community Response and Monitoring) Box sa Calamba City, Laguna nito lamang Marso 25, 2024.
Ang PNP A. L. E. R. T. button ay isang mobile application na idinisenyo para sa internal na komunikasyon ng kapulisan kung saan mapapabilis ang komunikasyon at pagtugon sa mga emergency at kahina-hinalang pangyayari sa isang lugar.
Samantala ang PCRM box naman ay isang outpost na kung saan 24 oras itong nakabukas para sa publiko na nangangailangan ng serbisyo ng kapulisan sa oras ng kapahamakan. Ito ay may sapat na communication tool at emergency kit na mas lalong makakatulong sa agarang pagtugon sa reklamo.
Sa nasabing aktibidad ay pinuri sina Police Lieutenant Colonel Arnel L Pagulayan, Deputy Provincial Director ng Laguna Police Provincial Office na nagrepresenta ng konsepto ng proyekto, Police Lieutenant Colonel Milany E Martirez, hepe ng Calamba Component City Police Station at iba pang mga tauhan na nagdevelop ng A. L. E. R. T. Button.
Sa naturang aktibidad ay dumalo ang ilan sa mga kilalang bisita na sina Hon. Roseller H Rizal, City Mayor, Calamba City, Laguna, Police Colonel Gauvin Mel Y Unos, Acting Provincial Director ng Laguna Police Provincial Office at Atty. Mia Antonette M Quijano, Provincial Officer, Laguna-NAPOLCOM 4A.
Ang inilunsad na proyekto ay isang mahalagang hakbang patungo sa pagiging huwaran ng mga kapulisan ng Laguna para sa community-oriented policing at sumasagisag sa dedikasyon sa pagpapanatili ng kaayusan at kapayapaan sa pagkamit ng Bagong Pilipinas.
Source: Laguna Police Provincial Office
Panulat ni Patrolwoman Angelica Rica S Teng
