Tuluy-tuloy ang mga isinasagawang programa ng Police Regional Office (PRO) 2, sa pamumuno ni Police Brigadier General Steve Ludan, upang linisin ang hanay nito bilang bahagi ng Intensified Cleanliness Policy ng Philippine National Police (PNP).
Patunay dito, mahigit 100-katao ang dumalo sa idinaos na Weekly Online Fellowship ng PRO2, katuwang ang My Brother’s Keeper Life Coaches (MBK-LC), kagabi, Oktubre 18.
Ang Weekly Online Fellowship ay isinasagawa kada ala-sais ng gabi tuwing Lunes. Sa pamamagitan nito, nabibigyan ng pangaral at pagpapayo ang mga pulis hinggil sa kanilang moral at spiritwal na aspeto. Gayundin, napapaalalahanan ang ilan na nalilihis ng landas.
Dumalo bilang panauhin sa online fellowship si Police Lieutenant General Dionardo B. Carlos, The Chief Directorial Staff, kung saan nagbahagi siya ng testimonya at mensahe para sa mga kapulisan at pastor na kasama sa naturang aktibidad.
Ayon kay PLtGen Carlos, dapat laging magpursige ang mga kapulisan na linangin ang kani-kanilang Compentency, Constancy of Service, Communication, at pagiging Christ-like upang maging mas epektibo at mas mahusay na alagad ng batas.
Bukod sa Weekly Online Fellowship, isinasagawa rin ang programang KASIMBAYANAN (Kapulisan, Simbahan, Sambayanan) sa buong Rehiyon. Layon naman nito na paigtingin pa ang pagtutulungan at pagkakaisa sa pagitan ng PNP, simbahan at pamayanan para sa isang mapayapa at maunlad na komunidad.
Ang Project KASIMBAYANAN ay inilunsad ng PRO2 noong Hunyo 18, 2021, katuwang ang iba’t ibang Advocacy Support Groups at Faith-based Groups sa rehiyon.
Samantala, nakasama rin sa naturang fellowship sina Police Brigadier General Eric E. Noble, ang Director ng Police Community Affairs and Development Group; Regional Coordinator ng My Brother’s Keeper na si Pastor Danny Punay; at si Police Colonel Renell Sabaldica, ang Provincial Director ng Cagayan Police Provincial Office.
#####
Article by Police Corporal Josephine T Blanche
