Inilunsad ng Police Regional Office 3 (PRO 3) ang pinalakas na seguridad at pinaigting na checkpoint operation sa buong bahagi ng Central Luzon kaugnay sa election period para sa pambansa at lokal na halalan nito lamang Enero 12, 2025.
Ayon kay Police Brigadier General Jean S Fajardo, bagong talagang Regional Director ng PRO 3, 314 checkpoints ang inilatag sa rehiyon na may kabuuang 2,438 pulis na naka-deploy.
Sa pagsisimula ng umiiral na gun ban, 25 katao ang inaresto dahil sa pagdadala ng mga baril.
Ang mga naaresto ay naitala na lima (5) sa Bataan, dalawa (2) sa Bulacan, walo (8) sa Nueva Ecija, anim (6) sa Pampanga, at tatlo (3) sa Zambales.
Nanawagan si PBGen Fajardo sa publiko na makipagtulungan sa mga awtoridad sa panahon ng checkpoint operations.
Mahigpit na ipinagbabawal ang pagdadala ng mga baril, nakamamatay na sandata, at pampasabog mula Enero 12 hanggang Hunyo 11, 2025.
Ang mga lalabag ay mahaharap sa mabibigat na parusang may pagitan ng isa hanggang 12 taon na pagkakakulong.
Tiniyak naman ni PBGen Fajardo na susunod ang mga pulis sa tamang mga patakaran at igagalang ang karapatan ng mamamayan.
Patuloy na isinusulong ng PRO 3 ang mapayapa at maayos na halalan sa pamamagitan ng mahigpit na pagpapatupad ng batas at maagap na mga hakbang pangseguridad.
