Cebu – Arestado ang 40 taong gulang na ginang sa Cebu matapos makumpiskahan ng nasa halos isang milyong halaga ng shabu sa PNP buy-bust operation na inilunsad noong Huwebes, Enero 26, 2023.
Kinilala ni Police Lieutenant Colonel Randy Caballes, Chief of Police ng Talisay City Police Station, ang nadakip na si alyas “Flordeliz”, biyuda, residente ng Sitio Sto. Niño, Barangay Suba, Cebu City.
Ayon kay PLtCol Caballes, naaresto ang supek pasado alas-10:00 ng gabi sa Sitio Mananga 2, Barangay Tabunok, Talisay City, Cebu ng mga operatiba ng Talisay City Police Station ng Cebu Police Provincial Office.
Nakumpiska mula sa suspek ang nasa 140 gramo ng hinihinalang shabu na may Standard Drug Price na Php952,000, isang black sling bag, at buy-bust money.
Ang suspek ay mahaharap sa kasong paglabag sa Sec. 5 at 11, Art. II ng RA 9165 o Comprehensive Dangerous Drugs Act of 2002.
Bunsod ng matagumpay na operasyon, tiniyak ng buong lakas ng kapulisan ng Talisay City na kanila pang paghuhusayin at paiigtingin ang kampanya kontra ilegal na droga at sa lahat ng kriminalidad para sa kaayusan, kaligtasan, at kapayapaan ng lungsod.
