Nasamsam ang higit Php9.8 milyong halaga ng smuggled na sigarilyo sa Barangay Sirawan Joint Checkpoint sa Toril, Davao City nito lamang ika-16 ng Enero 2025.
Kinilala ni Police Major Sheryl Y Bautista, Hepe ng Toril Police Station, ang suspek na si alyas “Toy”, 37 anyos, drayber at residente ng Misamis Oriental.
Nakatanggap ng report mula sa concerned citizen ang mga awtoridad na may isang close van na ginamit at hindi lehitimong J&T truck courier.
Nang maharang sa checkpoint, hindi makapagbigay ng kaukulang dokumento ang suspek, kaya’t agad na nakipag-ugnayan ang mga awtoridad sa J&T, at nakumpirma na walang koneksyon sa naturang kumpanya ang sasakyan at naturang suspek.
Umabot sa 251 kahon ng Modern Cigarettes ang nakumpiska at nagkakahalaga ng Php9.8 milyon.
Ang tagumpay na ito ay nagpapakita ng dedikasyon ng mga puwersang pangseguridad ng Davao City PNP na tinitiyak ang kaligtasan ng mga residente at nagsisilbing babala sa mga posibleng magtangkang magpasok ng mga ilegal na produkto sa rehiyon.
Panulat ni Pat Shairra Rose A Aquino
