Nadiskubre ng mga awtoridad ang tinatayang Php8 milyong halaga ng fully grown marijuana plants sa isinagawang marijuana eradication sa Brgy. Loccong, Tinglayan, Kalinga nito lamang ika-25 ng Setyembre 2024.
Ayon kay Police Colonel Gilbert A Fati-ig, Provincial Director ng Kalinga Police Provincial Office, ang matagumpay na operasyon ay ikinasa ng pinagsanib na pwersa ng Provincial Drug Enforcement Unit/Provincial Intelligence Unit, Tinglayan Municipal Police Station, 1st at 2nd Provincial Mobile Force Company, Kalinga Police Provincial Office, at Regional Mobile Force Battalion 15.
Ang operasyon ay nagresulta sa pagkadiskubre ng isang plantasyon ng marijuana sa isang communal forest na may tinatayang lawak na 2,000 square meters at may nakatanim na 40,000 na piraso ng Fully Grown Marijuana Plants na nagkakahalaga ng Php8,000,000 Standard Drug Price.
Bagamat walang nahuling cultivator, lahat ng binunot na fully grown marijuana plants ay naidokumento at sinunog sa mismong lugar. Pinuri naman ni PCol Fati-ig ang mga operatiba sa matagumpay na operasyon at sinisiguro na lalo pang paiigtingin ang kampanya kontra sa ilegal na droga, gayundin upang matuldukan ang paglaganap ng pinagbabawal na gamot sa kanilang nasasakupan.
Ang Kalinga PNP ay nagpapakita ng suporta sa isinusulong ng Pangulong Ferdinand R Marcos Jr., na whole-of-nation approach na kinakailangan para masugpo ang paglaganap ng ilegal na droga tungo sa isang mas mapayapang Bagong Pilipinas.
